(KOTHOMA BWSA)
AGULIO PUILA
- Janaka Tripura(Aslong)
Ani langmao tinino puila agulio maphaio kakani logi , aswk malkhung kwbangma tinino puila nugo,khao aswk khe tongthokjak ha sakao de tong nokha tolade tong sawise manliya . sapung ogo mai kwrwi tobose mairok okhwiliya tongthokma bai.
Hati barsa wngkha Khepengrai aguli phaimani tabukbo bini bwkhani pass paiyakho , bo wansugo kamio kiphilya sini bini kaka bai paithakni wngwi teisa aguli gurina muchungjago. Bini kakano sanabo kirijakjao bini kaka kisa thamchi kutung borok.
Khepengrai agulio maphaimani wngkha ahai, bini kaka Hotirai tabuk agulio traffic police ni sebuk khwlaio. Salsa holiday-o Hotirai kami thangphru Khepengraino aguli naina muchungjago hwnwi tubui phaio tei Khepengraino sao ani logi twlangwi yaklaprog kamchwlwirog pairwanw, agulio malkhung kwbangma phunuk anw..
Khepengrai ni umor tabuk bisi nwichi(20) ni sikla chwrai, bini kami Mairang twisa , kamio jotono huk khwlai chanai borok wngmabai lekha –pora porinani kokrog aswk wansugwi manya. Khepengrai sal phaikhe buma buphani logi hugo thangwi samung makhwlaijao. Bose tabuk agulio, abaino khepengraini bwkhani tongthokmung aswkno bakrum barjak....
Khepengrai agulio phaimani hati barsa wngkha teinini salo khe kamio kiphil sinai, phiyaba bo thangna muchungya tamni hwnmale bini hamjakmani manwino bini kaka bono pairiya kho,, abo wngkha Yaklap jorsa, kamchwlwi kangsa. O manwi mungnwi twiwi bini imang wao sukrubo wngsuk kha. Jora jora mokol basio yaklap kajak kamio cherairogni bwskango himjak bolaijak,, kamchwlwi kwtal chumjak. O kokrogno khepengrai wansugwi tongphuru bini kaka saphaio,,,
- Tho,, babusa town gurilai grana teisa nwngbo khwnakhe kami thangsinaiba.
- kaka, ang nono kaisa kok sanada?
- tamo sadi? Tamo kok...
-ummm... saliya? Ulo sasinai Kaka..
Salbo koktisal phung aisiri siri sal kahamba teisa Aguli dolio gurilaina hwnwi ongkhorlaio Khepengrai tei bini kaka. Sapung dolio gurilaikha,, nailaikha Raja khor, Budha mandir, children park dalbidal naijaknai kholarog. Gurilaimang dipor kheklai sal kormolele khe haptwtwi wngkha. Khepengrai bini kaka no teisa saphio- kaka ang nono kokthaisa sanada? Saliya...
Hotirai wansugwi naikha , tamo kok;sana nai saya ? ulo swrapsa tongwi hotirai muitu manjago ohh.. yaklap pairinani samani tongo ang... hmm abose wngkhwna. Swrapsa gurilaiwi Khepengraino Yklap tei kamchwlwi pai rio .. yaklap kwtal manwi Khepengrai warak warak wngwi sao- kaka tho.. nogo thanglaisinai tabukle salthangkha... Khepengrai khabising bising imang nugo..
“Tabukl yaklap kwtal makasinai, kamio thangwi buino phunuknai buini bwskango kamchwlwi kwtal chumwi ama no phunuknai,, kamio ani hai buini kebo tonglak.”
Tabuk khe khepengrai kami thangnase ula ula bini yaklap kwtal buino phunuk nani.
Sal thangmabai town ni nok bwkhak kiphil laio , lama himtwtwi buibai koksana muchung jago Khepengrai, kamio aswk kok per..per sanai borok hati barsa wngkha bini kaka bai simi kok sawi matongo, bini sak chalai baksa kwbangma malaio haiphano bono bo kok swngnai kwrwi bobo sai manya,( Khepengrai saimanya Agulini tongmungrog ahai hwnwi) , bini khao wansuk naio- tamo o agulini chwrairog kaisa tei kaisa thwnglaiya kokrog salaiya, hamjaklaiya, kwthalaiya.
Khepengrai lama himtwtwi Agulini nokrogno yasibai lekao –sa-nwi-tham-brwi... lekhawi lekhabaiya bini kaka no swng phio-
-kaka, o agulini nokrok tamswk ari bojak khoroksabai tei khoroksa chubalaima,berailaima nukya.
- o.. agulini tongmung chamung ahaino..
- khepengrai haino hai swngphiro- kaka , o agulio manwi phalnairog tamo wansa mang, borok biyang ni aswk phaibaikha? Oro khe chini Tiprasarog manwi phalmanya de tamo? Oro manwi phalnairog joto tiprasa hwnkhe ang tei ani kamini wanjwi kok manyarogbo phaiwi oro kokbork kok sawi manwi paiman khamun,, na kaka,,?
- tamo wansa ..wansa wngwi tongkha bui khwna anw, siring khe himdi,, boroni aswk chwraibai mwchangya kokrog man nwng. Oro omohai kokrog tasadi.
A jora himtw twi achomsa watwi nobar phairio , khepengrai tei bini kaka Hotirai yago sati(hungkong) kwrwibai watwi manjagwi thango.. nogo sogwiba sisi lala wnglaikha.
Mairok songwi chalaiba horni da chuku(9 Pm) tamlaikha khepengrai watwi manjakmabai horo lumwi kwchangjako, belai hamya barimabai nogo tonwi tei chukliya hwnwi Hotirai a horono G.B hospital twlang thango, khepengrai bini kakano sao ;kaka ani yaklap kwtal bai kamchwlwi kwtal twidi logio bui khogwi twlangnaise ,aw hwnwi sajao hotirai, bini ama songno koktun rohornabo kamio keboni phone kwrwi wngmabai koktun sogwi liya. Hospital o jater jat khaiwi thwirogbo rwi naikha haiphano khepengraini langmano mwthang manliya.. a horono khepengrai ni langma chojakha. Thwina swkang salango kaka ani yaklap boro ano ridi ani ama ano naising tongkhwna ang kami thangsinai.....?
Comments
Post a Comment