Ani Langmao Kaitorni Hamari manmarog

Ani Langmao Kaitorni Hamari manmarog

Janaka Tripura

(Aitorma Baptist Church)

      Puila-o chini kwplaisa Subraiyung Kaitorno ani khabai-khukbai hambai rwo, tamni hwnba Kaitor chubamabai tini ang Aitorma Baptist motha-ni Bisi nwi chiba Ruphai Bisi Ter-2019 no (Silver jubilee) manjak mankha aboni bagwi chini kwthang Kaitrno lobsao tei Ruphai Bisi Ter wngnai hwnwi khwnawi ani khapangbo tongthogo. Kaitor chini Aitorma mothao aswkkhe hamari lukhlaikha abono chini kukbai sabai manya, aboni bagwi chini JSBA Association ni adong tai lai thangjak Pastor rogno hambai marwo. Tini borogni saktharmungbai chwng Kaitorni Hamari yachgwi tongo. Aitorma Mothani wngwi kaisa Ruphai Mukumu eba Souvenir Bijab karinai hwnwi saimanwi angbo wansugkha kaitor ano hamari rimani kokrogno kisa-sa swisinai wansukkha, aboni bagwi silver jubilee committee rognobo Kaitorni mungbai hambai rwo.

Sinimung:- Ani achaimani sal wngkha 1990 bisi November talni sal chisa(11) salmario achaio. Ani achaimani kami ‘Haria Mani Roaja Para-o(Natin Manu) abo Natin manu amchaio khobjago, Tabuk ang tongmani thai(place) Chawmanu uttar longtharai “Mega barna Karbari para”. Tabuk ani umor Bisi nwi chichar(28) sikla kaijakyakho, ang 2014 bisio B.A passed khaikha, tei 2015 diploma in kokborok tai 2017 bisio khe Tripura University-o Master Degree(M.A) KOKBOROK khaikha,abo bebak kaitorni hamari, ani langmao Music-no belaikhe hamjago, abono karwibo kokborokni literary Magazinerog kwbangma swikha – Aitorma Magazine, Jorani khorang, Gairing, Twimuk akorog, ani babu Govt. Service(pension) wngkha, tei Aitorma Baptist Mothani khoroksa Life Deacon, Mungkhe Jarma Sing Tripura, Amani mung Kandarai Tripura, Chini nukhungo Chwla mang Khorokbwrwi(4) tongo ang jotoni kusu.

Langmani Kothoma:- Ani langmao Kaitorno manwi kwbangmano hamari mankha, Hamari ni kokno norokno sakhe baksa borok poito chaya phano wngwi mano, tamni hwnkhe Elembago samahai chini sak sak muchungtwi wansukma rogno kaitorni phola kebengo, Kaitorni pholani muchungtwi tongnairogse kaitorni samungno sawi mano,

Ani umor jephuru bisi ba(5) ang chwraikho aswk khasiya kho, ang belaino keram tai ani bwsakrog hamya sal-poti kulum bemar manjago, tal(month) waisale hospital thangna nango, aphuru ani Ama-Babu song Christian-o hapjak haphano a jora ani mokolo borogno aswk poito rakmani nukya, Girjaobo aswk kwrwngmani bo nukya, ani Babu bo tongmung kwchamno aswk khibimanyakho, muitumano a jorao Chawmanu o Aitorma motha kaisa tongo, Aro angbo waisa waisu thango, kaitorni kokthairogno aswk sisukya tai sawibo manthaya. Aphuru Aitorma mothao tongnai JSBA Association ni S.T Pautu ni poribar, bini bwsajwk Miss.Lalzuati hwnwi khorksa chwngno lekha phwrwngmani ang tabukbo muitu tongkho, aphuru ang tai Mina Rani Debbarma, bo khe tabuk Deacon Mantu Debbarma ni bwsajwk okra, borokbo a jorao chini nok ganao tongo, Miss.Lalzuati a jorao chwngno KG-I jora bini noko lekha phwrwngkha, aboni ulo ano St.Paul School o admission khainani sakha haiphano ang chwrai chikon wngmabai tei Rang kwrwi ani Ma-Babu song gosiliya admission bo wngmanliya hinwi ang sawi mankha. Aboni ulo Bengali medium chawmanu school-o admission khaikha class-I o, chawmanu o class-X jora porikha ulo kha, Chailengtao Class-XII passed wngkha, aboni ulo 2010 bisio Agartala o B.B.M College porinani thangkha, college life belai tongthok wngjagwi ani muchungtwi tongkha Kaitorno bo poknani naikha, ani college life tong phuru agartala o sadar- North Association rogo Christian panda manjakha, borogni tongmung chamung nugwi ani khao Kaitor kok sawi tongo.

Ang chwraini simi Christian haiphano Motha bai kahamkhe kwrwng mani wngkha 2006 bisini simi, aboni swkang ang Jampui hill o thangmani kokno kisa sanai 2005 rogo wngnai, JSBA o Golden jubilee o thangnai hwnwi chini Aitorma mothani siklarog salaikha, a jora pastor Lalremruata chini chawmanuo tongo, pahuru Jampui o panda manjagwi ani bwkha swlaijagkha Kaitorni thani kahamkhe kwrwngna chengkha. Teibo kahamkhe ani bwkhao kaitor kok samani wngkha –

salsa JSBA bai twiduljak chini chawmanu amchai o puila 2008 bisi o crusade programme khainai hwnwi khwnakha, ang saimanya crusade tamo? Ulo sai mankha bolongo surilainai hwnwi. A jora o jampuini borokrog bolongo chwngno twlangkha angbo thango, suriphuru ang bolong hachalo saichung thango, ang aphuru surite surite kaitorani ani bwkhao kok sakha nwng ano hamjakkhe ani kok makhwna nai, ang surimani thagwi manliya ang aphuru bokhorokno tolao khe Damsa(1 gonta) surikha, Kaitor ani khao kok sakha ani chayano gosidi hwnwi, ang bebak Kaitorni thani yapharkha, ang belaikhe khao kirima hai wngkha, o sal ni simi ani langmao swlaijakma phaikha, ani sakni bemarrog hamkha ang aphuruni simi tei kulum kwsarog bo wngliya, ang o kokno kebono ani mothao kebono sayakho tabuk jora, saichung tongo. Kaitor ano o hamari rimani ani langmao obo ani bwkhabai- mokolbai –bukhukbai poito khaio. Aboni bagwi ang joto sikla-chalairogno koio, jephuru chwng khabai khukbai wansukmabai Kaitorni thani suriwi sano aphuru kbuino Kaitor nini surimano khwnao tai Hamri rwo.

Kaitorni hamari manmarogno sawi sabaiya, salsa chini Aitorma Baptist motha kaisa yanji bera tongmani tabuk Building nok kotorma naithok mankha, tei Bisi nui chiba Ruphai bisi ter mankha abo bebak  Kaitorni hamari, aboni bagwi Elembak o samahai- (I korinth 9:6) “....Maichwlwi kisa sarnai borok bo mai kisa manai, maichwlwi kwbang sarnai borok bo Maikwbang manai” abohaino chwng Kaitorni hamri kwbang manna hwnkhe tei bo maichwlwi kwbang sarlaisinai,

Paithago haino hai hambai marwo Chini Ma-Pha wngwi naikolwi tongnai Jampui sakan Baptist Association (JSBA) rogno borogni chubamung tei mwrwkma kahambai tini chwng Ruphai Bisi jora sokphaikha, phaidi chwng palkhe Kaitorno loblaisianw.