Analysis of kokborok Drama 'Kok kisa Koktang Hai'(1984)by Nanda kumar Debbarma

Analysis of kokborok Drama  'Kok kisa Koktang Hai'(1984)by Nanda kumar Debbarma

-Janaka Tripura

1984 Bisini Swikwrwng Nanda Kumar Debbarma bai swijak Kokborokni Pula Amjogwi naimung Thungnuk (Experimental Drama) 'Kok kisa Koktang hai' o thungnuk kaisa Borok bosongni Hukumu-Mukumu kwmawi thangna naimano romwi narwkmani thwngnuk. 

Kok kisa  koktang hai (1984) o thungnuk(Natok/Gain) ni swijak bwlai kwrwi, omo kaisa amjogwi naimani thungnuk(Experimental Drama) omoni kothoma khe ahai- Collegeo poriwi tongnai chwrairog dolsa Atharomura hathaio Picnic khwlainani hwnwi thanglaio, phiya borog Horsa a bolongono hor ailainai, Agulini nongkhorwi Bausai kamio sogwinani dibor kheklai kha, phiya hachwk sakao tongtho-thok jaga manwi arono Picnic khwlailai Sinai tei Horbo lairisinai hwnwi chonglaikha, baksa chajakliya wngwi omohai bolong ode picnic khwlai hwnwi kokwalai tisakha, baksaba chajagwi omohai jaga naithok hathai boro mannai hwnwi sakha, baksaba naithok phano wngthun sitra phano wngthun omono chini achaima ha hwnwi kok bokha, baksaba sakha chajakya hwnkhe tamoni bagwi phai Birkhung kawi buini hao thangwi Twibom rukungo picnic khwlai phaiman bla, paithago orono tongsinai hwnwi chonglaikha, janija kanmung-chumung swlailaiwi hani bwsani bumul nalaikha college o porinairog, kamini borok wngwi thangbaikha twikherengo thangwi tukulaikha, holong beserni Athuk, khangrairog romlaikha, gantharog kholaikha, bolongni Mui kwthwng thumlaikha Bol rutuklaikha, Thaparog khurwi mai-mui songwi chalaite-chalaite sanja laikha, Nokhao Tal kiting kasawi phaikha. Haikhe kurum kuthum achuklaiwi kok salaite salaite hor thukha, Hor diporni siyari kwchangdo dor sago nangjak phaibaikha, nokhani Tal kheklaiwi mwrangwi khama bwkhak thangna chengkha, Buphang kuchuk sakao chok-chorok masa mairum chogwi tongo Takhuk bo masa jogoluwi ganatwi birwi thango, Bolong siring siringkhe horni boyarbai thwngjagwi tongo, Mwktwrwi phaijakbaikha haikhe arono thulaisinai hwnwi luajima nalaikha, borogni bising-o Okra bo sakha norog thuna muchungkhe thubai sidi ang mwrwgwi tonganw ang thuna muchungkhe khoroksano socha anw oro kirina mungsa kwrwi hwnwi Homchang kaisa phwnangwi Bijab kangsa kariwi poriwi tongkha, A jora biyangni bo jani Omor chakra chu-chu khoroksa phaiwi a siklani phikungo yakbai mihimwi rwphaikhe Sikla sundru jagwi naisakhe chu-chu sakha ta kiridi ang ganaono tongo norog ani gairing nukliyana eba naina koro khwna nono saichung achugwi tongmani nugwi ang kok kisa salaianw hwnwi nongkhorwi phaio, Sikla swngkha nwngle sabo wngkha ba chu-chu ? Chu-chu mwnwiwi sakha Laibuma hor aijaktwi wngkha nokha khaksatwi chumui dolsa nobar watwi tubuwi phaikha Homchangbo thwi thangkha, thuwi tongnai chwrairog bo sichabaikha, chu-chu sakha dakti-dakti ani Gairingo himbaidi,  chu-chu ni kokbai jotono thangbaikha tei nokha Bayung sibsawi Gairing baitwi baitwi wngwi tongkha siklarog Chu-chu ni Gairingni Thongrog Yongmalrog romwi kwbagwi narwk lai tonglaikha.

Nobar watwi thakha Atharomura hachwkni besertwi tai waisa aichuk pasawi phaikha toksarog pungbaikha, habani jora phaiphi kha siklarog aphurukhe sakha chu-chu chwng tabuk kiphilwi thangsinai chu-chu sakha thangdi bwkha riwi porilaidi tei ani Gairingno tapokdi doo..

 O kothomano thungnuk phunuk phuru koklam swijakya mwsanairog lukurogni bisingtwi atomsa  bachawi sikadrop khe hayao thangwi phaidi natok khwlailai Sinai hwnwi chengsalaio, kokborok natokni bechebo omohai phunukmung tei wngyakho, natok musanairog wngkha- Ruhi  Debbarma, Sunil Debbarma, Chandra Bala Debbarma, Sanjit Debbarma, akosong, O natok kwbangma koktun bwlaio swijakkha, omo kokborok sahitya sabani tei kaisa thungnuk chapnai tai kokmthingnai kokrwbaini athukiri Nanda kumar Debbarma.