KOKRWBAI KOKBITI PINMA PANDA

KOKRWBAI KOKBITI PINMA PANDA

Janaka Tripura

          Kokborok kokrwbaino hamjaknairog tei kokrwbaini maichwlwino ha gwnangwi pinnai bagwi thangnai February talni 11 salmarini chasalo kokrwbai kokbiti pinnai bodol tei jorani khorang bai luajijak kaisa kokrwbai panda khaijakkha Mandwi amchaini Mandwi Bazar H.S School-o. Panda chengjakkha phungni dam chisa(11:00am) jorao, pandao Naruai okra wngwi chati mwswngwi rikha kokrwbai kokbiti pinnai bodolni ojama tei jorani khorang kokrwbai bwlai komthingnai Mg.Narendra Debbarma tei bono chubakha pandani achukphang Barswkang Hostelni Principle Mg.Bimal Debbarma, Pandani hayao achukkha Mandwi harungni hoda hamkwrai nainai local Secretary Mg.Ranjan Debbarma, Mandwi H.S schoolni Asst. Headmistress Mj.Gita Debbarma tei Pritilata Debbarma(Mistress), Rupa Debbarma (Mistress).

         Pandano mwchangrwkha college tei Universityni swrwngnairog, abono karwibo mandwi school ni swrwngnairog bebagwi khorok chichuku(98) manjakkha,kokrwbai kokbiti pinnai bodolni adongrog tei College –University porinai kwtal jorani swinai sikla chalairog pandano mwchangrwkha borogni bising tongo Amal Debbarma, samir Debbarma, Rama Debbarma, Apul Debbarma, Jayatry Debbarma, janaka Tripura, Budu Debbarma, Rakesh Debbarma, Amrit Debbarma, Arijin Debbarma, Binata Debbarma, Satya Debbarma akosong. Abono karwibo Khumwlwng collegeni swrwngnairogbo pandao manjak phaikha.

        Pandani pula bwkhak Rwchapmung tei mwsamung bai lamsokkha Mandwi Rwngnokni swrwngnai tei swrwngnaijwksog, kwcharo tiprasani sirisitini mwsamung mamita tei jaduni rwchapmung  mwsamung dalbi dal khe mwchangrwi tisakha aboni ulo koknarwkmung tei koklop koktang porimung ni bechebo twlangjakkha ,

       Pandani komthingnai wngwi samung tangkha kokrwbai kokbiti pinnai bodolni cultural secretary Mg.Samir Debbarma,Puilani koknarwkmungo mandwi Rwngnokni phwrwngnai mg.Sanjit Debbarma lamsokmungni kok sakha tei pandao manjakphainai borom gwnang narwairogno borom yapharkha.Aboni ulo Pinnai bodolni Amal Debbarma koknarwkthani sakha- kaisa hod-dopha kuchugo kasana hwnkhe bini sak-sakni hukumu tei kokrwbaino kwrakkhe romwi narwkna nango tei kuchugo tisane nango,

         Kwcharo kwtal jorani sikla chalairogno sakbaithang swijak koklop porinani bechep jorarijakkha porikha Jayatri Debbarma, Janaka Tripura, Devid Debbarma,Lipika Debbarma,Samir Debbarma.

Mandwi H.S Schoolni Headmistress Gita Debbarma sakha-Jorani khorang tei Kokrwbai kokbiti pinnai bodolrog Kokborok kokrwbaino pirmani tei swinairogno khabacharwmani abo belaino samung kaham tei wansukmung kuthukbai gwdaljak. Tabuk je switongnairogno bo kokkwcharkha jorani khorang kokrwbai bwlaini bisingtwi kaham kaham swinai achaiwi Jorani khorang teibo chwngsai phaithun,Kokborok kokrwbaio kothomayung swinai aswk bangthayakho aboni bagwi kokthomayung swimungo bo yak rwnani bagwi kokkwcharkha.

Aboni ulo Mandwi amchaini hoda hamkwrai khainai Local Secretary Mg.Ranjan Debbarma sakha- Koborok jotonisai nangmani kok, kuchuko kasajak kok, o kok salsa kwmana nai tongmani phiyaba tabuk tei kwmaya, tamni hwnkhe Kokborok dalbidal swimungbai sinijakkha Kokborokni kokthairog aswkno gwnang abo kubun jaga kwrwi, abono teibo kuchugo bokna hwnkhe nini ani jotoni phan tei swimung-samung tangna nangsinai,Kokrwbai kokbiti pinnai bodolni ojama tei jorani khorang kokrwbai bwlaini komthingnai Mg.Narendra Debbarma sakha- Swkang thangnairog khibi kwlangkha aboni bagwi nwng tabuk swlapna nangnai sogwinani bagwi kolomtwi khibina nangnai, tabukni sikla chalairog okhoimung pinnani nangnai, joto borokni thani kaisa okhoimung tubunani abo sikla chalairogni samung, mwktwrwi thangjakno sochawi swkang himnairogbai baksa himrwnani norokni samung, aboni bagwi wansukmung baino chwng kasanani nangsinai swlapnani nangsinai.

Mandwi rwngnokni swrwngnairogni bisingo koklop tei rwchapmung rwchaplaikha, koklop sanai bwrwi khoroknwi wngkha Puja Debbarma bai Bubar Debbarma. Khumwlwng collegeni Binud rupini tei Jitendra Debbarma. Paithak bwkhago Quiz bataimung khwlaijakkha o Quiz bataimungno tuidulkha Tripura Universityo swrwng tongnai Amal Debbarma, batailaimungo kwbangkuk kwplai wngkha mandwi rwngnokni swrwngnai tei swrwngnaijwk song, kwplai wngnairogno swikong kongsa tei Jorani khorang kokrwbai bwlai kangsa yapharjakkha.

Paithakni wngwi Kokrwbai kokbiti pinnai bodolni ojama tei jorani khorang kokrwbai bwlai komthingnai Swikwrwng Mg.Narendra Debbarma bini koklop kaisa sawi paithakni kok kwcharkha-Bui sogwikha swkangno khasiya wansukna rwngya wngmabai chwng tabukbo sogwimanyakho, aboni bagwi chini Gyan-ni okhoima tei okhoina kwrwng wngna nangnai wansukmung tongna nangnai,o panda-o phainairog jotono janija pailaiya aswk pailaiya phano jora kisa mankhe tongthok tongyawi kokrwbaino pinnani phailaijao, tamni bagwi hwnkhe chini wansukmungno pinnani, naharmungno pinnani. Teibo sakha kokrwbai kokbiti pinnai simi koborokno bwskang twlangwi mannai haiya norokbo jotono ojama wngwi mabachanai,

Pandani rosamungni kok narwkkha Barswkang hostelni principle tei pandani achukphang okra Mg.Bimal Debbarma bo sakha-Salsa chini hukumu –mukumu tongmani kwmawi thangbaikha, chini nangkukmani manwirogno saknangya wngmanibagwi, bo hostelo mwrwknai wngwi bini hostelni kokno khursakha bini hostelo khorok 150  swrwngnairog tongo borogni joto kaisa imang tongo, tongmung bo bini swrwngnairogno lama kaham phunuk manyakhe borogni thinango imang koronai, nukhung hamya wngnai, aboni bagwi chwng jesa samung phano thinangni kokno wansugwi samung matangnai,

     Paithakni kok narwkmani ulo panda mwthakmungni koksakha pandani kokmthingnai Samir Debbarma, hambai rwkha pandao manjakphainai joto okra-chakra tei koklop sanai pandano naithokkhe twidulnai mwsamung-Rwchapmungbai naithok rwnairogno, tebo nangkukmani hambai rwkha mandwi Bazar H.S school-o phwrwngnai Mg.Sanjit Debbarmano tamni hwnkhe pandao chamung tei nwngmung jaikhe rimani bagwi tei thai yapharnai Mandwi Schoolni Head mistress Mj.Gita Debbarma nobo hambai yapharkha, panda sarikni dam bwrwi tamwi soti thamchi(04:30 pm) kaham kwrwngkheno mwthaklaikha,ulo janija nogo thanglaikha.