1970-2015 Bisini Kokborokni Kothoma Bwsarogno Cherwi Naimung

 

1970-2015 Bisini Kokborokni Kothoma Bwsarogno Cherwi Naimung

-Janaka Tripura

Kokborok Kokrwbaio Kothoma bwsa chengsajakmani yaphang bwkha naihorkhe Snichi(70) dosokni simise chengsajagwi twrwk-twrwk yapri semani nujago, kothoma bwsa wngkha Hoda-dophao Borokrogni Thangsungo Borokni Langmao nukmani mangpilirogno tisawi tubuo, phunugo tei Kubui kothomarogno swnamwi tisao, Kothoma bwsao chwng mano kaisa eba kainwini swlai kisa kwbang thwngwrwngrog, kothoma bwsa swinairog borogni wansukmungno aswk phuarwi manya, chikon-chikon rwbaibai gothokriwi swilaio. Kokborok kokrwbaini Laibumao Kothoma bwsa Buni dophani kahai aswk bangthayakho, hwnphano kwbangkukno swimungo chwnajak tei bolaimung manjak, tabuk Rwngnok kotor tei Rwngnokyungrogo porijagwi tongo.

Kokborok kokrwbaio kothoma bwsa swina chengjakmani laibumano uphilwi naikhe khursawi mano aborog wngkha-

Kokborokni puila kothoma bwsa “Hathai” mungwi kairijakha 1977 bisio Swikwrwng Nagendra Jamatiabai, o kothoma bwsao Tiprasarog Sakbaithangni Haa _o bahaikhe tong kesep wngkha aboni kothomarogno tiswi phunukjagkha.

“Lama kaham naitugwi” swikha Swikwrwng Rabindra Kishore Debbarma, o kothoma bwsa puila karijagkha 1982 bisi. O kothoma bwsa ongkhorkha “Lama” mungwi kokborok kokrwbai bwlaio.

Swikwrwng Shyamlal Debbarma bai karijak Kubun kokni kokswlaijak Kothoma bwsa “Nokarini kothoma”  o Bijab karijagkha 1986 Bisio, o Bijabo Wanjwi Bosong kwbangma swikwrwngrogni Kaham kaham kothomano kokborok bai swlaiwi swijakha, aboni ulo 1995 Bisio “Choba kaisani ulo” kothoma bwsa Bijab bo swikha.

Aboni yagulo 1987 Bisio Swikwrwng Shyamlal Debbarma nino hainohai “Adong” mungwi kokborok kothoma bwsa swiphikha.

1989 Bisio phaiwi hainohai tei kangsa Bijab ongkhorokha Swikwrwng Binoy Debbarmabai swijak “Nakhwrai” mungwi, O bisiono 1989 bisio Swikwrwng Haripada Debbarmani “Elemni bibi” mungwi Kothoma Bwsa Bijap swijagkha, oro bebagwi thaichar kothoma bwsa swijakha.

  Haino hai 1993 Bisio Swikwrwng Nagendra Jamatiabai Karijak “Bolong” mungwi kothoma bwsa karijagkha, o kothoma bwsa mojomo kotor, bini sak-langmani kothomano rwgwi swijak kothoma.

1996 Biso phaiwi “Bolongni Khum” mungwi swikwrwng Sunil Debbarma ni kothoma bwsa karijakphikha, o kothoma bwsa bijabno jotoni swlai chabwi swijak hwnwi chung sawi mano.

1999 bisio ‘kokborok sahitya sanskriti samsad’bai karijak “Biyal” mungwi kothoma bwsa bijab obono swikha swikwrwng Snehamoy Rai Chowdhuri, bini teibo sakbaithang swijak kothoma bwsa- ‘Chethuang tolao’(2000), ‘Langma Kaisa’(2010), ‘Mokol bwskango’(1994), Majilatani bwlwng, ‘Tongthokni Imang’,

1999 Bisiono Swikwrwng Sudhanwa Tripura ni “Dongor kamini Ochai” kothoma bwsa karikha ‘Lampra pohor prakasani’

2000 bisio karijakphikha “Busu” mungwi kothoma bwsa Bijab ongkhorokha, swinai wngkha Swikwrwng Sunil Debbarma. Swikwrwng hainohai 2012 bisio phaiwi tei kangsa Bijab kariphikha “Jorani bwthai” mungwi o bijabo thaibwrwi kothoma bwsa achukthai mankha.

2000 Bisini January talo karijagkha Swikwrwng Haripada Debbarma bai swijak kokborokni mungwnang kothoma bwsa bijab “Jalai Topupu” O Biajpo ‘Pi-koto’ tai Bamonsa o kainwi kothoma bwsarog belaino khwnathok kothoma, O Bijabno karinairog wngkha ‘Hachwkni khorang publishers, bijabo Bebagwi thaichinwi kothoma bwsa tongo.

Kokborok kothoma bwsao tei kaisa Jotoni swlai khursajak kothoma bwsa “Imangni Yakhilik” swikwrwng Narendra Debbarma bai karijak o bijab 2001 bisio Sapokjagkha. O kothoma bwsa bijabni ‘Fruti’ mungwi kothoma bwsa belaino tabukni jorabai gothokjak.

Swikwrwng Kunju bihari Debbarmabai swijak kothoma bwsabo kokborok kokrwbaio mojom gwrwng kaham nukjagkha biniswijak 2001 bisio “Basulam” mungwi kothoma bwsa Bijab karijagkha, oro bebagwi thaichuku kothoma bwsa swijak tongo, 2002 bisiono “Mwnakni pohor” mungwi tei kaisa Bijab kariphikha, abono karwibo “Mo salni Pohoro” mungwi 2003 bisio tei kangsa kothoma bwsa Bijab karikha, obo tabuk Tripura University Kokborok MA o phwrwngjagwi tongo.

2006 bisio Swikwrwng Atul Debbarmabai swijak “Toksa Hakaya” o bijabo bebagwi thaichisa kothoma bwsa achukthai mankha.

“Hachwkni Muktwi” Swinai Rabindra Kishore Debbarma, o bijabno karikha 2002 bisio‘Hachwkni khorang’ kokrwbai motharog,

Kokborok kokrwbaio kothoma bwsa rutugwi naikhe Yaphao lekhai mandrop kho, aboni bagwi Wansukmung jotoni bagwi, kokrwbaino teibo kuchugo tisane bagwi koklop, koktang no karwibo kothoma bwsa ni achukthai teibo hilik wngnani banta. Kwtal jorani swinairog tabuk kaisa kainwi swilaino tongo obono simi wngnai wnasukyawi chini naharmung wngkha kokrwbai no phuarnani kuchuk kotor khainani.

 

Swimuk:-

1.      Achariya.Dr.Nitai,Feb.2014,Kokborokni kokrog baksa, Yakhwrai publication, Indranagar jagatpur, kalibari road Agartala west Tripura India.

2.      Debbarma.Rabindra Kishore,2013 Kokborok kokrwbaini Rukungo, Jora Publication, Krishna nagar Agartala, Tripura West.

3.      Achariya.Dr.Nitai,1996,Kokborokni kokrok kisa, Yakhwrai publication, Indranagar jagatpur, kalibari road Agartala west Tripura India.

4.      Chowdhury,Kumud Kundu, 1999, Kokborok basha o sahitya, akshar publication, Agartala Tripura West.