Bubagra Birchandra manikyani yakromwi hayungni swikwrwng Rabindranath Thakur - Janaka Tripura(Aslong)

 

Bubagra Birchandra manikyani yakromwi hayungni swikwrwng Rabindranath Thakur

-Janaka Tripura

Laibumano khursakhe simise laibumani kokrogno sawi mano, Da kwtalbai samung  tangkhese bo teibo kubuk wngo phiya ahaino berawi tonkhe abo sorkhiwi phaitago gelewi thango, abohaino Tripurani laibumao Bubagrarogni yakkumun kwbangmano chini laibuma tabukbo koksao, abono kwchwng khainani kwtalkhe suchanani saboni samung ang sai manya? Chini Hasteni kwbangma thwngkwrwng adongrog Bubagrarogni samungrogno hamya sanai bo tongo kahambo sao, Jesa phano wngthun jorano rwgwi jorabai gwdalw o ha sakani bebak samung wngo, abo kebono sejawi manya, Tripura hasteo sara charchi brwi(184) Bubagrarog naikollangkha abo chwng jotono sawi mano tei kubui phiya sara charchi brwi(184) Bubagrani samungrogno cherwi naikhe mungsaya mungsa kaham eba hamya lukuni mokolo kwlaio, aborogni bere Bubagra Birchandra Manikya bini jorani simi Tripura hasteni laibumao kwtal jora phaijak hwnwi salaimani koktunbo mano, bo Bubagra simiya bini kokrwbai wansukmung tabubai wngya hwnphano sara dokchi bisi swkangono bini swimung tongo, Chwng joto saimano tabuk hayungni swikwrwng hwnwi sinijaknai Rabindra nath Thakurni kokno bo swimungni haparo yapiri rimani tei Bono puila swikwrwngni borom rinaile Chini hasteni Bubagra Birchandra Manikyano,  swikwrwng Rabindra nath Thakurni jephuru umo nwichi aphuru Bubagra Birchandra manikyani umor brwitham chi(43) oro kaisa kokno khursathai kwlaio tamni hwnba Bubagra Birchandra bai Rabindranath Thakurni kwrwnglaimungni kokse hwnkhe-23th june 1881  bisio Rabindra nath Thakurni umor nwichi(20) swikwrwng Rabindra nathni a jora ulba bijab ongkhorkha “vaghna ridoy” omo kaisa koklop rwchapmung bijab, bijabni morokma khoksa, o bijabno swikha swikwrwng Rabindra nath phatar Hao lekha-pora paiwi nogo kiphil phur. Tabuk kok wngkha ahai bahikhe Bubagra Birchandra manikya swikwrwng Rabindra nathno puila borom yapharkha aboni laibuma wngkha ahai-

Jephuru bangla bisi 1288 bisi o Rabindra nathni ulba bijab “Vagna ridoy” ongkhoro teini bisiono Bubagra Birchandra manikya puila Bhanumuti bai nukhung khao, a joraono Bubagrani nukhungo Rabirdranath ni bijab “Vagna ridoy” sokphaio tei Bubagra birchandra o bijabno poriwi Hamjamungni haparo kwlwgwi mokolni muktwi yorjago, Bubagra Birchandra manikya aphuru bobai baksano swikwrwng, ulo Bihik Bhanumuti atomsa thwimabai khakhamjagwi Rabindranath-ni swimungno muitu manjagwi ‘Prem morichika” hwnwi kaisa koklop bijab swio, Bubgra Birchandra ajora Rabindra nath-ni “Vagna ridoy” bijabno khaphurjagwi aphuruni sachib Radaromon Gosh-no Kolkata Jorasakur Thakur nukhungo koktun rohorwi Rabindranath Thakur-no puila Tripura hasteni bubagra Birchandra manikya swikwrwngni borom yapharkha, abono Rabindranath Thakurni puila borom, borom manwi swikwrwng Rabindranath a jora Bubagra Birchandra-ni bijab kaiba poriwi lachimung mano, Bubagrani a Bijabrog wngkha Hori, Jhulon,Prem morichika, Sohag,Akal kusum, akorog, o bijabrog Rabindranath-ni bwkhao lachimung thubuo tei aphuruni simino Rabindranathni bwkha Tripura  hani wnasukmung mari achaio. Aphuruni simi Buagra nukhungbai kwrwngwi 1323 bangla bisi 12 falgun Agartalo Umakanta tongthai nogo kaisa pada songchajago aro swikwrwng Rabindranath phaiwi koknarwk thani sakha-“jibone je jos ami pachi, prithibi modye tinei tar prothom suchona kore diyechilen tar abinandaner dara. Tinei amar oporinoto aromber modye bobisyter chobi bichokhon dristir dara dekhte peyei tokhon amake kobi somadone sonmanito korechilen, jinni uporer sikhore thaken, tinei jemon sohoje chokhe porena takeo dekhte pan, Bir Chandrao temoni sedin amar modye o-spostoke sposto dekhechilen” o kokrog Rabindranath sakbaithang Bubagrano boromkhaiwi kok narwkkha,

Aswk bai simi thakya Bubagra Birchandra manikyani Thangsungni langmano rwksawi naikhe nugo bo chwraini simino kokrwbaini haparbai kwrwngjak, bini bisingtwino swikwrwng Ananga mohini devi kokrwbai achaio o kokrog kubui. Bubagra Birchandra manikya bisi Bachisini(57) umor joraobo rwchapmungni koklopyung swnamlangkha, wngya hinphano tini-bai 106 bisi swkang 1890 bisio Bubagrani kaisa “Jhulan” rwcahpmung bijab Thakur nukhungni ruaimung riwi tongo,

Bubagra birchandrani Kokrwbaino nuguwi Swikwrwng Rabindranath Thakur Bini langmao kaisano koktun bwlai swilango tei 1293 bangla bisi 23 boisak engreji bisi 1887 sal wngkha Srangsal(Wednesday), kobi Rabindra nath Thakurni umor aphuru bisi nwichisni(27) Kolkata Jorasaku Thakur nukungni simi Bubagra nukhungo Koktun bwlai kangsa swio, o koktun bwlaini swimung wngkha ahai- “Maharaja Bodkori suniya thakiben je, ami Tripura raj bongser itihas obolombon koriya “Rajorshi” namok uponyas likhitesi, kintu tahate itihas rokha korite parinai. Tahar karon itihas painai, ei jonyo aponader kase marjona prathona bihito bibechona koritesi, ekhon jodio onek bilombo hoiyase, tothapi maharaja Jodi Govinda manikya o tahar vratar rajoto somoer sobises itihas amake preron korite unomoti koren, tobe ami jotha sadya poriborton korite chesta koribo ........”

Bubagra Birchandra Rabindranath Thakurni o koktun manwi belaikhe khatungkhaja wngjagwi Talsani ulo banglani Joysto talni 18^th salmario Swikwrwng Rabindranath Thakurni thani koktunni kokphirokmung rohorkha, o kokphirokmungo ahai hwnwi swikha- “Aponi je Tripura itihas obolombon koria uponyas likhite jotno koritesen ihate ami chiro kritogo roilam, je je sthane itihas sohayota proujon hoi, ami adorer soti purbuto nana mul hoite taha koriya dite prostut asi........”

A jorani simi Bubagra nukhungbai Thakur nukhung kwrwnglainai chengsao, Tripurani Bubagrarog khakwlai wngmabai je nangmani chubachu rinai bagwi gosimungni barja yachago, tei o kokbo sawi rikha Tripurani mungwi laibuma achairinani swimung swina thangkhe je nangmani Rang-puisa chwng chubanai, obohai kok rwmani ulo Rabindranath Thakur bini langma “Rajorshi” tei “Mukut” swimung simi swilango,

Laibumani uklogo kaisa wansukmung achaio Bubagrarog Birchandra jorani Thakur nukhungbai halokbolaimani ulo siklaBugra Radhakishore-ni jora 1883 bangla bisio “Barsiki” mungwi koktuma bwlai ongkhormani swkang 1309 bangla bisio SiklaBuagra Radha kishore Manikya a jorani Rajmontri Ramani mohan Chottopadaye-ni thani koktun bwlai kaisa swiwi sakhwlairio- oro ahaikhe swijak tongo- “ Bangla kokno ang ani langmani swlaibo khabai hamjao, aboni bagwi Bangla kokno ang Bubagra nukhungo tini simi Bangla kokbai swimung swinani kokbokjao, tei o kokbo salangkha Engreji kokbai o ha koboljakya twi aboni naikolmung nainani kokbo sakha” (banglani kok swlaijak) (Krishnapa Datta , Tripura Itikotha) sawimano hasteo a jorani simi banglani kwrwngmung bangwi phaimani hwnwi phiya abo kwdwk romwi tongliya, oboni laibumabo khursakhe swraikhe nugo.

Kok wngkha ahai Bubagra Birchandra manikya jorao Kolkatani Rabindranath Thakur swimungni haparo kwrwngjakphano sinimung tei borom phuarjakyakho puila Bubagrani thani swikwrwng borom manwi bwkha kwrakkhe Bachamani, tabuk Hayungni swikwrwng Rabindranath hwnkhe kebo siniya kwrwi, jesaphano wngthun laibumani uklogo hwijak kwbangma tongo aboro twrwmai romwi baksa sorkhiwi komorw thangna naitongkha, komryasini suchawi satungo lamkhe eba Sorkhijak-no Holong kwthango hulkhe kwchwng wngwi teisa kwtal wngnai.